Nunani Avannarlerni ilinniakkanut pisortanit akuerisaanngitsunut namminerisamillu ingerlanneqartunut ilinniarnermi akiliutit akilerneqarsinnaanngillat ilinniagaqarnersiuteqartitsisoqarsinnaananilu.
Taamaattoq ilinniagaqarnersiat pillugit nalunaarut innersuunneqarpoq:
§ 23. Pissutsit immikkut illuinnartut atuutsillugit ilinniartut ilinniartitaaffinnut tapiissuteqarfiunngitsunut peqataaffigisaannut Ilinniartitaanermut Pisortaqarfik ilinniagaqarnersiuteqartitsinissamik aalajangiussaqarsinnaavoq, tassunga ilanngullugit:
1) ilinniagaqarnermik pineqartumik Kalaallit Nunaata sulisunik pisariaqartitsinerani.
2) ilinniagaqartup ilinniakkamut tapiissuteqarfiusinnaasumut assingusumut tiguneqarsinnaannginnerani.
Imm. 2. Ilinniagaqarnersiutit suut annertussusaallu tapiissutigisinnaaneri Ilinniartitaanermut Pisortaqarfiup aalajangiiffigissavai.
Aammattaaq ilinniagaqarneriuteqarneq pillugu nalunaarummi §30 innersuunneqarpoq:
Imm. 2. Ilinniartitaanermut Pisortaqarfik ilinniakkani aalajangersimasuni ilinniartitaanermut akitsuutit pissutsit immikkut illuinnartut atuutsillugit ilaannakortumik matussuserneqarnissaannik aalajangiussaqarsinnaavoq, tassungalu ilanngullugu:
1) Ilinniakkamut pineqartumut sulisunik Kalaallit Nunaat pisariaqartitsippat,
2) allanit aningaasaleeqataanissaq pillugu isumaqatigiissuteqartoqarpat, imaluunniit
3) ilinniagaqarnersiuteqarfiusutut ilinniakkamut assigisaanut ilinniartoq tiguneqarsinnaanngippat.
Malugeqquneqarpoq ilinniagaqartut Kalaallit Nunaanneersut NORDPLUS-imit Nunani avannarlerni ilinniarnissamut tapiissutinik qinnuteqarsinnaammata, Namminersorlutillu Oqartussat matumuuna periarfissap tamatuma ilinniartutut atorluarnissaa kaammattuutigaat.
NORDPLUS pillugu ukunani paasissutissarsiorsinnaavutit:
Styrelsen for International Uddannelse
www.napa.gl
www.nordliks.net
www.nordplusonline.org
2008-mi NORDPLUS aqqutigalugu tapiiffigineqarnissamik qinnuteqarfissap killigaa: www.nordplusonline.org
