Ilinniagaqarnersiutit taarsigassarsinerillu - nalinginnaasumik malittarisassat
Tunngaviatigut Kalaallit Nunaanni inersimasoq kinaluunniit Namminersorlutik Oqartussanit ilinniartuunersiaqarsinnaatitaavoq, ilinniagaq sivikinnerusoq sivisunerusorluunniit ingerlanniaruniuk. Taamaattoq qinnuteqartup Kalaallit Nunaannut attuumassuteqarnissaa pillugu aalajangersimasunik piumasaqartoqarpoq. Piumasaqaatinut taakkununnga inatsisitigut tunngavissat Ilinniagaqarnersiutit pillugit Inatsisartut peqqussutaanni nr. 5-imi , 14. november 2004-meersumi aamma Ilinniagaqarnersiutit pillugit Namminersornerullutik Oqartussat nalunaarutaat nr. 8., 27. marts 2008-meersoq
Ilinniagaqarniartut ataasiakkaat ilinniarnerup aallartinnginnerani piumasaqaatit, atugassarititaasut aamma ilinniakkamut tapiisarnermullu malittarisassat pillugit paasiniaalluaqqaarsimanissaat pingaartuuvoq.
Kikkut ilinniartuunersiuteqarsinnaappat?
Danskisut innuttaassuseqartariaqarputit
Kalaallit Nunaanni ilinniartuunersiaqassaguit Kalaallit Nunaanni najugaqartuusariaqarputit.
Kalaallit Nunaata avataani ilinniartuunersiaqassaguit piumasaavoq:
-
qinnuteqarnerup nalaani Kalaallit Nunaanni aalajangersimasumik najugaqarnissat, tamannalu sioqqullugu ukiuni 5-ini najugaqarsimanissat, imaluunniit
-
Kalaallit Nunaanni minnerpaamik ukiuni 10-ni najugaqarsimanissat, Kalaallit Nunaatalu avataani annerpaamik ukiuni 3-ni najugaqarsimanissat.
Ilinniakkat qassit ilinniartuunersiaqarfiusinnaappat?
Ilinniagaqalernissamut piareersarluni ilinniagaq ataaseq taassumalu malittaanik tapertaliussaasumik pikkorissarneq ilinniartuunersiaqaatigineqarsinnaapput, tamanna ingerlaqqiffiusumik ilinnialernissamut pisariaqarpat. Ukiut kingulliit tallimat ingerlaneranni ilinnialernissamut piareersaluni ilinniagaq ataasiaannarnak kipitissimagukku ilinniartuunersiaqarsinnaanngilatit.
Assassorissanik ilinniagaq (faglært) naammassisaq
ataaseq - taannaluunniit qaangerlugu ilinniarneq -
ilinniartuunersiaqaataasinnaavoq.
Tamatuma kingorna piumasaavoq,
ilinniaqqinniaraanni ilinniaqqinniagaq ilinniareersimasamik
pissusissamisuuginnartumik nangitsinerussasoq qaffasinnerullunilu.
Sivikinnerusumik ilinniakkanut (soorlu ukiut 2
ikiortitut ilinniakkanut) ilinniartuunersiaqartitsisoqarsinnaavoq
katillugit ilinniakkanut naammassisanut marlunnut.
Ilinniakkamik kipititsinerit qassiunissaat pillugit aalajangersakkat ingerlaqqiffiusumik ilinniakkanut atuutinngillat, tassani "qiorsisarluni ingerlatsineq" atuummat. Qiorsiarluni ingerlatsineq uani allaaserineqarpoq.
Taarsigassarsineq
Ingerlaqqiffiusumik
ilinniartut ilinniagaqarnersiaqarnissaminnik akuerisaasut
ilinniarnerminnut atatillugu taarsigassarsisiumallutik
Namminersorsunut qinnuteqarsinnaapput. Qinnuteqarfissaq Sunngu-miit
naqissinnaavat, Nuummilu Ilinniagaqarnersiaqartitsivimmut nassiullugu.
Semesterit tamaasa ataasiarluni attartorneqarsinnaapput: 6.000 kr.
Ilinniarnerup ingerlanerani ataasiaannarluni attartukkatut attartorneqarsinnaapput: 10.000 kr.
Ilinniartuunersiaqarsinnaatitaatillutit attartukkat
ernialerneqarneq ajorput, imaappoq ilinniakkannik ingerlatsiguit
Namminersorsuniillu ilinniartuunersiaqartitaallutit.
Ilisimatitsisussaatitaaneq
Ilinniartuunersiaqartitaanermut
sunniuteqarsinnaasut suulluunniit pillugit
ilisimatitsisussaatitaavutit. Ilisimatitsisussaatitaanermut
assersuutigalugu ilaapput najugaq, ilaqutariittut inissisimaneq,
ilinniakkat kipitiinnartarsimasat aamma soraarummeersimanerit
misilitsissimanerillu pillugit paasissutissat.
Ilinniakkamik ingerlatsineq
Ilinniartuunersiaqassagaanni
pisariaqarpoq ilinniarnerup illersorneqarsinnaasumik
malinnaaviginissaa, tassunga ilaallutik misilitsinnerit
soraarummeernerillu tamaasa peqataaffigineri, najuuttussaatitaanerullu
maleruarnera. Taamaanngippat tapiissutit malittarisassat atuuttut
naapertorlugit unitsinneqassapput.
Maalaarneq
Ilinniartuunersiat
pillugit aalajangiinerit maalaarutigisinnaavatit. Taamaaliussaatit
aalajangiinerup tiguneraniit sapaatip-akunneri 6 qaangiutsinnagit,
maalaarut uunga nassiunneqassaaq:
Ilinniartitaanermut Ilisimatusarnermullu Naalakkersuisoqarfik
Postboks 1029
3900 Nuuk
