Igasunngorusunneq
Igasoq susassaaleqisariaqanngilaq, igasoq Kalaallit Nunaanni igasunut iggarinneqqusaannermi peqataasinnaavoq.
Martin
Krogh 19-inik ukiulik Qasigiannguarmiu, Avannaata
Ilinniarnertuunngorniarfiani ukioq kingulleq ilinniartuuvoq. Martin
Kroghip sivisuumik sulinissani aamma iganeq nuannareqai.
Igasut igaannarneq, ajorput. Igasormi aamma kisitsisinnaasariaqarpoq, tassami nerisassat proteinii kisinneqarsinnaasariaqaramik, Martin angut qungujulasuusoq oqarpoq.
Martinip igasunngorsinnaanissani pillugu ilaquttani oqaloqatigisarpai.
Atsaga igasutut ilinniarsimasuuvoq, tamanna pillugu sunik tamanik oqaluttuuttarpaanga. Atsaga aamma oqartarpoq, igasut sivisuumik sulisartut. Uangali sivisuumik sulineq aamma iganeq nuannareqaakka. Taamaammat igasunngornissara kisiat pilerigivara, Martin oqarpoq.
Martin aasamut GU-mi naammassissaaq, Inuilimullu Narsamiittumut ilinniariartinnani misilittagassarsioqqaarusuppoq.
- Ukioq ataaseq atuanngiffeqaqqaarniarpunga, atuanngiffeqarninni neriniartarfimmi suleqqaarusuppunga misilittagaqalernissara anguniarlugu, Martin oqarpoq.
Torrak!!!!
Igasoq sulinermini qaqortunik sulliseqartarpoq.
- Nalunngilara siullerpaamik igasut sullisaannik atiseqqaaruma, assut imminut tulluusimaarutigissallunga. Tamannami takorluugaraara, Martin oqarpoq.
Martin avannaamiuuvoq, Inuililu inuussutissalerinermik ilinniarfik Narsamiilluni. Martinip kujataani najugaqalernissani ajornartorsiutigissanerpaa?
- Nunatta Kujataata takunissaa qilanaaraara, aamma allamut nuulluni ilinniariarnissaq nuannissaqaaq. Kisiannili igasut nunatsinni iggarinneqqusaannerannut peqataanissara qilanaarinerpaavara. Isumaqarpunga igasunut iggarinneqqusaatsitsisarneq torrassuusoq, Martin oqarpoq.
Martinip iggarissuunini kammalaatiminut uppernarsareerpaa.
- Kammalaatikka igaannut narrunngisaannarput. Iganermi pannakaaliornissara nuannarinerpaavara, tamanna nassuerutigisariaqarpara, Martin qungujorujussuarluni naggasiivoq.
