Oqaatsinik paasisaqarsinnaannginneq

Arnajaraq Lyberth 29-nik ukiulik, Ilisimatusarfimmi allaffissornermi semesterit arfinilissaat ilinniartuuvoq. Arnajaraq meeqqat atuarfianni 11. klassimi atuartilluni, aalajangerpoq AFS-erniarluni.

Taamani Danmarki takoreerlugu aamma qallunaatoorsinnaareeriama, misigisimagama nutaanik misileerusullunga, taamaalillunga AFS-ernissara aalajangiuppara, Arnajaraq oqarpoq.

Arnajaqqap Panama toqqagassatut kingullertut toqqarpaa, kisiannili nunani allani toqqakkamini inissaqartinneqannginnami Panamamut aallartitaalluni.

- Naak nunami kingullertut ornikkusutanni AFS-eraluarlunga peqqissiminngilluinnarpunga. Tassami imminut assut ilikkarpunga, imminullu aamma tatiginerulerlunga. Nuannernerpaanik angajoqqaarsiaqarama, nutaanillu kamalaatitaartorlunga. Minnerunngitsumik inuuninni puigunngisaannagassannik misigisarpassuaqarlunga, Arnajaraq oqarpoq.

Oqaatsit

Inuit nunani allani najugaqarsimasut, tassa oqaatsinik allanik atuiffiusuni najugaqarsimasut, misigisimassavaat oqaloqateqarniarnermi paatsooqatigiittarneq.

- Panamamut tikeqqaarama, sivisujaamik uffanngilanga. Isumaqaramami angajoqqaarsiama uffaqqunngikkaannga, sunaaffa taamaanngitsoq, Arnajaraq oqarpoq.

Qaammatit siulliit Arnajaqqap angajoqqaarsiani iluamik, oqaluussinnaasimanngilai.

- Qaammatini siullerni pingasuni paasisaqarsinnaanngilanga, soorunami atera kisiat paasisinnaavara, angajoqqaarsiamami Any-mik taasarpaannga. Qaammatit pingasut qaangiummata Spaniamiusut ilikkariartulerpunga. Spaniamiusut ilinniarninni inunnut aperinissara ilikkarpara, soorlu qassinik ukioqarpit? Spaniamiusut ima oqartarput “Cuantos anos tienes?”. Angajoqqaarsiama ilaat naapillugu aperaara qassinik ukioqarnersoq, aperereerakku qatanngutisiama tigupiloorpaanga oqarfigalungalu inuk aperisara aperisimagiga qassinik iteqarnersoq, Arnajaraq illarluni oqarpoq.

Arnajaqqap angajoqqaarsiani Panamamiittut ulloq manna tikillugu attaveqarfigai.