Nunarsuaq ilinnut ammavoq

Kinaluunniit AFS aqqutigalugu angalasinnaavoq. Illit oqaluussaqaraangavit immaqa aappillikujullutit ittuukujuttaraluarlutillu, AFS aqqutigalugu nunarsuarmi nuna ornikkusutat ornissinnaavat. Inuusuttorpassuit nunani assigiinngitsorpassuarnit ilittulli AFS-ertut, inuillu nunaqavissut AFS aqqutigalugu naapissinnaavatit. 

AFS-erninni angajoqqaarsiaqassaatit, tassanilu inuppassuit angajoqqaarsiatit aqqutigalugit inuit nutaat naapissallugit. Imatut oqaatigineqarsinnaavoq, nunarsuaq misigiguk Kalaallit Nunaata avataaniittoq. 

Kikkut angalasinnaappat?

• 15-it 18-inillu akornanni ukioqassaatit. 
• Inuuneq Kalaallit Nunaata avataaniittoq soqutigissavat alaatsinaallugulu. 
• Ullut tamaasa inuuneq allanngorartoq misigerusukkukku. 
• Inunnik nutaanik kammalaatitaarusukkuit. 
• Imminut tatiginerulerusukkuit, inersimanerulerusukkuit, namminersornerorusunnerlu misigerusukkukku.
• Oqaatsinik nutaanik ilikkagaqarusukkuit, nunami allami ilinniarusullutit nutaanillu aamma ilikkagaqarusukkuit. 
• Ilaqutariinni allarluinnarni, nunamilu allami najugaqarusukkuit. 

Piareersarneq

Sinnattut angorusullugu ilaquttatit kammalaatitilluunniit oqaloqatigikkit. Nuna ornissallugu soqutigisat qineruk, kammalaativit angajoqqaavilluunniit takorluugarinngisaannik. Atuakkanik misissuataarigit, nuna ornikkusutavit oqaluttuassartaanik. Atuakkanik atorniartarfiit internitsiluunniit atorneqarluarsinnaapput, nuna ornikkusutap oqaluttuassartaanik paasiniaanermi. 

Eqqarsaatigilereeruk ukioq ataaseq angajoqqaatit kammalaatitilluunniit takusussaanagit. Eqqarsaatigiuk, sapinngilara? Takorloorsinnaaviuk nunatsinni qatannguteqarnat inuullutit tassanngaannaq qatanngutersiaqalersinnaanerit? Eqqarsaatigissavat aamma nuna allarluinnaq kulturilu allarluinnaq ornissallugu. Eqqarsaatigissavat inuuninni puujugassarinngisannik misigisaqarnissat. 

Qanoq aningaasatigut ikiorneqarsinnaavit?

Fondenut assigiinngitsunut aningaasanik qinnuteqarit. Imminut allaaserissaatit, tamanna misilinnikuunagu aallaqqaammut sapernalaartarpoq, kisiat eqqaamallugu imminut tatigerpasillutit imminut allaaserissagavit. Oqaluttuariuk aningaasat qinnuteqaatitit sumut atorniarnerlugit, soorlu aamma aningaasat taakku qinnutiginerlugit allaaseriuk. 

NunaFonden-imut aningaasanik qinnuteqarsinnaavutit, NunaFonden 10.000 koruuninik aningaasanik tunniussisarpoq. Una iserfigiuk: http://www.nunafonden.gl/

 CIRIUS-imut aamma qinnuteqarsinnaavutit. SIRIUS aningaasaleeqaartarpoq 7.500 koruuninik, angalanerillu naammassigukku angalasimanerillu imaqarnilioreerukku CIRIUS-ip aningaasat 2.500 koruunit tapiiffigissavaatit. 

CIRIUS Danmarkimi, ilinniartitaanermut naalakkersuisoqarfiuvoq. Aningaasaliisarneq pillugu annertunerusumik paasisaqarusukkuit uku iserfigikkit.   www.iu.dk/10000 aamma atuaruk  CIRIUS Evalueringer af skoleophold paarlaaqatigiittarnermut tunngasortaa iserfigiuk.

Angalanissannut AFS-imiit akuerineqareeruit, kommunerisannut aningaasanik qinnuteqassaatit. Kommunerisannit 5.000 koruuninik, tapiiffigineqassaatit.  

Angalanissat pillugu aamma aningaasanik qinnuteqassaatit, Oqaatsinik Pikkorissarfimmut. Soorlu Qaqortumi najugaqaruit, USA-mukassallutillu taava Oqaatinik Pikkorissarfiup Qaqortumiit USA-mukarnerit akilissavaa, taamatullu aamma uternerit Oqaatsinik Pikkorissarfiup aamma akilissallugu. Oqaatsinik Pikkorissarfik, ima nittartagaqarpoq  www.oqaatsit.gl.

AFS pillugu annertunerusumik paasisaqarnerurusukkuit www.afs.dk iserfigiuk.