Ilusilersuineq: kalaallisuut ammillu

”Kalaallisuut ammerinerlu” – ”Grønlandsdragten og skind behandling”

Sisimiut

Ammerinermik ilinniarnerup allaaserinera

Ammit tassaapput Kalaallit Nunaanni atortoqarnikkut kulturip tunngavippiaasa ilaat. Ammit tassaapput timip atisaanik, isikkat atisaannik aammalu angallatit illullu ilaasa sananeqarnerini atortuusartut. Taamaalilluni piniakkat amii inuuniarnermi oqortussatut masannaveeqqutissatullu pingaaruteqarluinnartut. Ammit assigiinngitsut suliarinerini atornerinilu ileqquliussat kalaallit kulturiannut inuuniarnerannullu immikkuullarissumik ilisarnaataasut.

Amminik ilinniarnermii siunertaapput amminik, ujallunik inalussanillu assigiinngitsunik suliaqarnermi periutsinik pigisaqaannarnissaq ineriartortitsinissarlu.

Ilinniartut amminik assigiinngitsuunik sanaassanik suliaqarnermik, erisarnermik, ammerinermik toqqorsisarnermillu periutsinik assigiinngitsunik ilinniartinneqassapput. Ujallunik qipisineq mersornerlu ilinniartitsinermut ilaapput. Pingaartinneqarpoq ilinniartup ntaaliorluni pilersitaqarlunilu sulinerminut atatillugu periarfissani suullu assigiinngitsut katiterneqarsinnaasut sunggiusassagai.

Ilinniartoq periarfissinneqassaaqamit sanaassat atorlugit nutaaliorluni sulinermigut ilusilersuinermik ineriartortitsinissaminut soorlu aamma periutsinik sanaassanillu assigiinngitsunik misissuinermigut misilittaanermigullu nammineq ilusilersuisinnaanerminik ineriartortitsinissaminut. Ilinniarnermut ilaatinneqarput maskinat sulinermilu atorneqarsinnaasut allat ammerinermi oqilisaassutaasinnaasut naleqquttullu atorsinaanissaat.

Kalaallit amminik atortoqarlutik ilusilersuinermik kulturiannik ilisimasaqalernikkut piginnaaneqalernikkullu ilinniartup nioqqutissioriaatsit assigiinngitsut ilisimasaqarfiginialersussaavai. Ilinniartut sullivinni ammerinermik sulinermikkut aammalu assassornermi atortunik, maskinanik sulinermilu atortunik allanik atuisinananermik ilinniagaqartussaapput. Taakku saniatigut nioqqutissiornermi periutsinik assigiinngitsunik ilisimasaqalerlutillu atuisinnaalersussaapput.

Pingaaruteqarpoq ilinniartut isumassarsinerminniit inerlugu naamassisaqarnerminnut atatillugu suleriaatsimik tamakkiisumik paasisaqarsninaanerminnik ineriartortitsinissaat. Taakku saniatigut sullivinni avatangiisinik isumannaallisaanermillu ilikkakkat tunngaviliisussaapput sulianik aaqqissuussinernik ingerlatsinernillu naleqqutunik qinersisinnaanissamut. Nunap immikkoortortaani assigiinngitsuni ilusilersuinermik kulturimik ilisimasaqalernermigut ilinniartup takusinnaalissavai oqaluttuarisaanermi suut ataqatigiinnersut aammalu ammit atorlugit nammineq ilusilersuinermini ilisimasani qanoq atorneqarsinaanersut.


Kalaallisuuliornermik ilinniarnerup allaaserinera     
Kalaallit Nunaanni qanga nalitsinnilu atisat ilusaat amerlaqaat. Avanersuup eqqaani, Kitaani Tunumilu atisat assigiinngillat. Oqaluttuarisaaneq eqqarsaatigalugu kalaallit atisaat assuutaallu ullumikkut atorneqartartut nutaajupput. Atisat oqaluttuassartaat ullumikkumut ineriartortinneqarlutik iluserilersimassaat ilinniagassat ilagaat. Atisatigut ersersinneqartarpoq atuisup kinaassusia, inuiaqatigiinni qanoq inissisimanera, nunap ilaanit simeersuunera, ukiup ilaata qanoq ilinerani atorneqartarnerat, qanoq utoqqaatiginera aammalu arnaanersoq angutaanersorluunniit.

Kalaallisuliornermik ilinniarnikkut siunertaavoq ilinniartut atisat oqaluttuassartaannik ilisimasaqalernissaat taamalu kulturikkut ileqquliussat qanoq tunuliaqutaqarnerinik paasinninnissaq, atisat ilusaannik ileqquliussanik ineriartortitseqqinnissaq, atisatigut ileqquliussanik tammatsaaliinissaq ineriartortitseqqinnissarlu aammalu assigiinngissutinik attassinissaq.

Ilinniartitsissutigineqartarput sanaassanik atortunillu ilinniarneq, sanaassanik qinersisarnq toqqorsisarnerlu, amminit sanaassanik assigiinngitsumik qangatut nutaanillu passuseriaatsit periutsillu, ilisserusiorneq, ammit atorlugit atisaliat qangatuut nutaallu kilui, ammit qittuttut annoraamernillu, sapannganik amminillu assigiinngitsunik qalipaasikkanik allalersuineq, paffequtinik/tajarutinik nuersaaneq, ujallunik qipisineq mersornerlu, annoraaminissanik amminillu atisanut atugassanik ikaartiterineq qalipaasersuinerllu.

Pingaartinneqartarpoq ilinniartup nammineq nutaaliorsinnaaneranik pilersitsitsisinnaaneranillu periarfissaanik assigiinnngitsunillu katiterisninaaneranik sungiusaaneq. 

Ilinniartoq periarfissinneqartarpoq kalaallisuuliornermigut illusilersuinermik paasisaqarnissaanik ineriartortitsineq soorlu aamma periutsit sanaassallu assigiinngitsut atorlugit nassaariniarnerisigut misiligaanikkullu nammineq nutaaliorsinnaanerata ineriartortinnissaa.
     
Ilinniartut sullivinni kalaallisuuliornermikkut ilinniarfimmiinnerminnilu atatillugu assassornermi atortut, maskinat sulinermilu atortut allat atornissaannik paasisaqarsinnaanerat piginnaasaqarnerallu annertusiartortinneqartarpoq aammalu assigiinngitsunik pileriartortitsisinnaanerannik pissarsiaqartinniarneqartarlutik.

Pingaaruteqarpoq ilinniartut isumassarsinerminninngaaniit suliap naammassillugu inerneranut suliamik tamarmiusumik paasinnissinnaalernissaata ineriartortinnissaa. Tamatuma saniatigut sullivinni avatangiisinik isumannaallisaanernillu ilikkaagaqarnerat tunngaviussaaq suliassanik pilersaarusiornermi ingerlatsinermilu eqqortunik qinersisinnaalernerannut. Nunap immikkoortortaani assigiinngitsuni ilusilersuinermik kulturimik ilisimasaqalernermigut ilinniartup takusinnaalissavai oqaluttuarisaanerup qanoq ataqatigiinnera aammalu ilisimalikkani atisap immkkoortuinik assigiinngitsunik ilikkakkani nammineq ilusilersuinermini atorsinnaalissallugit.

Una tassa faginik ilinniarnerup qaffasissusillip ataani inuutissarsiutinik ilinniarneq. Ilinniarnermut akuerisat ilinniarnersiuteqarsinnaapput.

Saaffissaq:

Kirstine Berthelsen:

Aqqartarfik Blok 5-201
3911 Sisimiut.
Tlf: 866909
Mail: arnatilin@greennet.gl