Nunani allani ilinniarneq

Kalaallit Nunaata Danmarkillu avataanni - maannamiit: nunani allani - ilinniarniarlutit pingaaruteqartumik aalajangertinnak pisariaqartunik imminut apereqqaartariaqarputit:

Sooq nunamut allamut qinnuteqarniarpunga?

• Misigisassarsiorusunnerua?
• Tassanngaannaq isumataarnerua - imaluunniit pisariaqavippa?
• Oqaatsitigut ilinniakkamullu tunngasutigut piginnaasakka ajunngillat?
• Aningaasaqarnikkut inissisimanera ajunngila?
• Nammineersinnaassuseqarpunga, inerisimalluarpunga, ammasuuvunga attavigiilluarnermik pilersitsisarpunga?
• Anguniakkannut toqqaannartumik aqqutaava imaluunniit allanik aqqusaartueqqaarnerua?

Assersuutigalugu misigisassarsiorusunnerinnaq nunani allani ilinniarusulernermut pissutaappat - pimoorullugu eqqarsaatigisariaqarpat misigisassarsiorusunneq ilinniakkap naammassinissaanut akornutaaginnalissannginnersoq. Misigisassarsiorusunneq ilaanni pitsaasuullunilu iluaqutaasarpoq, kisianni ilinniartilluni ulluinnarisaq - ilinniakkatigut oqaatsitigullu annertuunik piumasaqarfiusoq atuutileraangat - misigisassarsiorusunnerinnaq naammattanngilaq. Taamaalinerani misigisassarsiorusunnerinnaanngitsumik pisariaqartitsilissaatit. Aningaasaqarnikkut inissisimanerliorneq aammattaaq misigisassarsiorusussutsimik allannguisinnaavoq, piviusut nuannerunnaarlutik qularnaveeqquteqaranilu inuunertut misiginarsisarlutik.

Nunani allani ilinniassagaanni sivisuumik pimoorullugulu eqqarsarluarnissaq pisariaqarpoq. Ilinniakkap aallartinnginnera ukiumik ataatsimik sioqqullugu pilersaarusiorlunilu piareersartariaqarpoq, immikkuualuttorpassuit siumut takorlooruminaatsut inisseqqaartariaqartarmata, assersuutigalugu Australialiannginninni.

Aallaavittut nunami allami - imaappoq Kalaallit Nunaata Danmarkillu avataani - ilinniarnissannut tapiiffigineqarsinnaavutit, ilinniagaq minnerpaamik qaammatinik 3-nik sivisussuseqarpat, ilinniarfimmi pisortanit akuerisaasumi ingerlanneqarniarpat Kalaallit Nunaannilu suliffissarsissutiginissaa naatsorsuutigineqarsinnaappat (tak. § 17, imm. 2 ilinniagaqarnersiat pillugit nalunaarummi).

Illit nammaineq ilinniagaq nunami pineqartumi pisortanit akuerisaanersoq paasiniarlugulu uppernarsaasissavat.

Nunani avannarlerni ilinnialernissamut piareersaataasumik ilinniakkani, inuutissarsiummik ilinniakkani ingerlaqqiffiusumillu ilinniakkani akeqanngitsumik ilinniarsinnaavutit. Imaappoq danskit naalagaaffianni innuttaasutut Norge-mi ilisimatusarfimmi ilinniarnerit akilissanngilat, soorluttaaq svenskit Danmarkimi/Kalaallit Nunaanni GU-mi atuarniarunik akiliissanngitsut.

Nunarsuulli sinnerani taamaanngilaq, tamaanimi universitetini teknikkimilluunniit ilinniarfinni ilinniarneq akeqarpoq. Assersuutigalugu Tuluit Nunaanni USA-milu universitetini alutorineqarluartartuni ukioq ataaseq ilinniarneq 100.000 kr angullugit akeqarsinnaavoq.

Kalaallit Nunaanniit qinnuteqarlutit nunat avannarliit avataanni ilinniarnissat kissaatigigukku nalunaarummi § 17-ip saniatigut aammattaaq § 30 maluginiartariaqarpat, taannami malillugu ilinniakkami tapiiffigineqarsinnaasumi ilinniarnermut akiliutaasussanik tamanik aatsaat akiliunneqarsinnaavutit, ilinniagaq akiliinani ingerlanneqarsinnaanngippat akiliutissarluunniit pisortanit allanit akilerneqarsinnaanngippat.

Imaappoq USA-mi imaluunniit Tuluit Nunaanni universitetimi assersuutigalugu nakorsatut ilinniarnissamut tapiiffigineqarsinnaanngilatit, Danmarkimi Nunaniluunniit Avannarlerni allani akeqanngitsumik nakorsanngorniarsinnaagavit. Akerlianilli Canadami Australiamiluunniit marinbiologitut ilinniarniaruit tapiiffigineqarsinnaavutit, biologiimi sammivik taanna Danmarkimi ilinniarneqarsinnaanngimmat.

Namminersorsunit tapiiffigineqarlutik ukiumut nunani allani ilinniartut amerlassusissaat Pisortaqarfiup aalajangiiffigisinnaavaa. Taamaappoq soorlu timmisartortartutut ilinniarniartunut tunngatillugu, tamanna Tuluit Nunaanni USA-milu pisarpoq, ukiumullu annerpaamik ilinniartut marluusinnaallutik.

Malugissavat Namminersorsunit tapiiffigineqassaguit ilinniakkap aallartinnissaanut oqaatsinik misilitsinnerit pisariaqartut tamaasa angusiffigisariaqarakkit. Paasiniartariaqarpat ilinniarfiup kissaatigisavit oqaatsinik misilitsissimanissaq sorleq akuerisinnaaneraa. Tuluit oqaasiinik misilitsinnerit assigiinngitsut immikkoortumi tullermi qinnuteqarnermut periutsit eqqartorneranni takusinnaavatit.

Nunani allani ilinniarneq pillugu paasissutissat amerlanerit uani takusinnaavatit:
www.udiverden.dk
www.iu.dk
www.napa.gl
www.nordliks.net